Film labur palestinarren saioaKomisaria: Annemarie Jacir

Jakin dakidanez, Palestinako herritarren irudiak beti daude polemikan murgilduta, baita irudirik mundutarrenak direnean ere. Eta batez ere palestinarrek jasotako irudiak direnean. Gure bizitzak okupazio militarrak, lurren usurpazioak eta apartheidak eragindako indarkeria-espiral amaigabe batek definitu ditu. Are gehiago, une honetan sakonera ilunenean murgilduta gaude. Azken bost hilabeteetan, gure oinazea, gure heriotza eta suntsipena agerian egon dira, mundu guztiaren begien bistan. Istorio izugarriak... zuzenean eraildako haurtxo, haur eta gurasoenak. Horrela, gero eta albiste izugarriagoekin esnatzen gara goizero. Eta ez dakit zer den okerragoa, nazioartearen isiltasuna, munduaren ezintasuna genozidio hau geldiarazteko…

Film labur sorta hau errefuxiatu familietan eta okupazio militarrean jaiotako zinegile palestinarrek egina da. Bizitza osoa beren existentziaz jabetuta bizi izan diren zinegileak; familiekin partekatutako uneak, beren eguneroko bizitza, eskolara ikastera joateko nahia, lan egiteko ahalmena… hori guztia kanpoko botere baten kontrolpean. Film labur hauek istorioak kontatzen eta artea sortzen jarraitzeko modu ugarietako bat dira haientzat, baita beren lurraldean ukatzen zaien askatasuna aldarrikatzeko ere.

Argi dago film hauek guztiak 2023ko urria baino lehen egin zirela. Palestinari buruz zerbait dakien edonork badaki inoiz ez dugula askatasun egunik ezagutu. Hamaika puskatan apurtu dituzte gure bihotzak. Baina ez zaigu inoiz ezabatuko. Egiten duguna egiten eta maitasunez egiten jarraituko dugu. Gure erresistentziaren testigantza da. Film laburren sail hau hori da, ez gehiago ez gutxiago.

Annemarie Jacir (2019ko Donostiako Giza Eskubideen Zinemaldiaren Saria)

• From Palestine With Love (2022). Annemarie Jacir. Palestina. 4 min

75. urteurrena ospatzen duen Locarnoko Zinemaldiaren enkarguz, eta Postcards from the Future izenburupean, nazioarteko zinemaren panoramako hamaika pertsona ospetsu gonbidatu zituzten film laburrak egitera, beren herrialdearen postal moduan, ondoren Piazza Granden, munduko pantaila handienetako batean, proiektatzeko.

• Gaza-London (2009). Dima Hamdan. Erresuma Batua. 14 min

Gaza, 2009. Israel bortizki erasotzen ari da Gaza. Mahmoud Londresen dago; bere ama, berriz, Gazan harrapatuta eta bere deiaren zain. Palestinako egoerari buruzko irratsaio batean parte hartzea onartu du, baina mugikorra itzali behar du.

• Area C (2018). Salah Abu Nimah. Palestina. 10 min

Zisjordaniako C gisa sailkatutako eremuan, kolono israeldarrez inguratuta, Hussain txikia bere etxea kolonoengandik defendatu eta haiek urrun mantentzen saiatzen da, bertan bere gurasoekin geratu ahal izateko.

• Headcount (2020). Akram Al-Waara. Palestina. 14 min

Preso palestinar bat bakartuta dago Israelgo espetxe batean. Eguneroko giza interakziorako aukera bakarra espetxeko soldaduek zerrenda pasatzeko deia egiten duten unea da. Denboraren nozioa ez galtzeko borrokan, presoa behera etortzen hasia da. Handik denbora batera, labezomorro bat sartzen da bere zeldan, eta bere kontsolamendu iturri bakarra bihurtzen da.

• Vibrations from Gaza (2023). Rehab Nazzal. Palestina-Kanada. 16 min

Gazako ume gorren bizipenetan barneratzen gaitu filmak, Palestinako kostaldeko lurralde kolonizatu eta konfinatuan. Israeldar okupazioan jaio eta hazitakoak, eta sarraski ugarien lekuko, Amani, Musa, Bilaka eta beste ume gor batzuek kontakizun biziak eskaintzen dizkigute zeruko bonbardaketei eta droneen presentzia etengabeari aurre egin behar izateari buruz.