Giza Eskubideen 23. Zinemaldiaren programazioaren aurrerapena

Bestetik, kontatuko dituen historien artean daude Josef Mengeleren desagerpena, Bigarren Mundu Gerraren ondoren Hego Amerikara ihes egindakoa; sexu-indarkeriaren biktima diren emakumeek denuntziak egiteko orduan dituzten zailtasunak, eta emakume errefuxiatuen arteko sororitatea.

19:00/20:00etako emanaldien ondoren egingo diren solasaldietan gaurko hainbat gaitan sakonduko da, filmetako ordezkariek eta giza eskubideen arloan lanean diharduten pertsona, ekintzaile eta erakundeek parte hartuta; beren esperientziak publikoarekin partekatuko dituzte.

SAIL OFIZIALEKO FILM LUZEEN AURRERAPENA

• À bras-le-corps (2025). Marie-Elsa Sgualdo. Suitza-Belgika-Frantzia

Emmak 15 urte ditu, haurdun dago bortxaketa baten ondoren, eta landa-eremuko bere komunitate protestanteari egiten ari zaio aurre, autodeterminaziorako bidea egin nahian. Hala, bere trauma katalizatzaile bihurtzen du bere emantzipazioa lortze aldera, herrixkaren hipokresia moralari eta inguratzen duen Bigarren Mundu Gerraren espektroari aurre egin bitartean. Kontakizunak aurrera egin ahala, egia saihestezina agertzen zaio: inor ez da neutrala gerra garaian.

• Black Water (2025). Natxo Leuza. Espainia

2050. urtean Bangladeshek 220 milioi biztanle inguru izango ditu eta bere lurraldearen zati handi bat urpean geratuko da. Egoera horrek 10 eta 30 milioi biztanle arteko lekualdaketa behartua ekar lezake herrialdearen hegoaldeko kostaldetik, eta bangladeshtar asko "errefuxiatu klimatiko" gisa bertatik alde egitera behartu: mendearen erdialderako giza kolektibo hau mundu osoan 250 milioi pertsonak osatuko dutela aurreikusten da. Hortaz, gizadiaren historiako migrazio masibo handienaz ari gara, planeta mailan. Noiz arte izango da gai Dhaka hainbeste jende hartzeko?

• The Disappearance of Josef Mengele (2025). Kirill Serebrennikov. Frantzia-Alemania

Bigarren Mundu Gerraren ondoren, Josef Mengelek, Auschwitzeko “heriotzaren aingeruak”, Hego Amerikara ihes egin zuen bere bizitza klandestinitatean berregiteko. Bere semea berriro elkartuko da harekin eta bere begiradaren bitartez Mengelek bazter utzitako iraganari aurre egin behar izango dio berriro. Buenos Airestik Paraguairaino, Brasiletik igarota, Mengelek zehatz-mehatz antolatuko du bere desagerpena epaitua izan ez dadin.

• Girls & Gods (2025). Arash T. Riahi, Verena Soltiz. Austria-Suitza

Feminismoa eta erlijioa batera egon daitezke? Girls & Gods beldurrik gabeko bidaia bat da, gai hau aztertzeko Inna Shevchenkok sortu eta bultzatutako proiektua. Duela urte batzuk FEMENek botere-egitura patriarkalen aurka egindako protestetan buru izateagatik ezaguna, Shevchenko protestaren ordez elkarrizketaren alde agertu da, apaiz, iman, errabino, teologo eta beste emakume aktibista batzuekin. Elkarrekin, emakumeen eskubideen eta tradizio erlijiosoen arteko arrakalari heldu eta galde egiten diote beren buruari tradizio horiek genero-berdintasuna beren baitara ekarri ahal duten eta feminismoak leku sakratuetan bere lekua aurkitu.

• Iván & Hadoum (2025). Ian de la Rosa. Espainia-Alemania-Belgika

Iván maitemindu egiten da Hadoumez, lan egiten duen Almeriako berotegiko lankide berriaz. Hala ere, Ivánek lortutako lan-igoerak, hainbeste irrikatuak, eragina izango du bikotearen harremanean, behartu egingo baitu zer pertsona-mota izan nahi duen erabakitzera. Ian de la Rosaren opera prima, Berlinalen Teddy Award saria irabazitakoa, baita Zilarrezko bi Biznaga ere (Epaimahaiaren Sari Berezia eta Gidoi Onena) Malagako Zinemaldian.

• Made in EU (2025). Stephan Komandarev. Bulgaria-Alemania-Txekiako Errepublika

Film hau ere Gasteizen proiektatuko da, Zinemaldiaren eta Langile Zinemaren Astearen arteko lankidetzan

Ivak Bulgariako landa-eremuko arropa-fabrika batean egiten du lan, eta gaixotasun iraunkor eta misteriotsu bati aurre egiten ari zaio. Bere herri txikian Covidaren lehen kasua bera dela jakiten denean, berri hori azkenik ez duen j'accuse bihurtzen da: lehenik, lantegiko jabeen aldetik, erantzukizuna desbideratzeko gogoz, eta gero, lankideen aldetik, semearen aldetik eta, azkenik, komunitate osoaren aldetik, nahiz eta urteak diren herritik atera ez dela. Birusaren aurreneko biktimak agertu ahala gero eta gogorragoak dira publikoki jasotzen dituen irainak, berehala paria sozial bihurtzera eramango dutenak.

• Promis le ciel (2025). Erige Sehiri. Frantzia-Tunisia-Qatar

Marie bolikostarrak, garai batean kazetari eta orain artzain, hamar urte daramatza Tunisian bizitzen. Bere etxea babesleku bat da Naneyrentzat, etorkizun hobeago baten bila dabilen ama gaztearentzat, eta Jolierentzat, bere familiak itxaropen guztiak jarrita dituen ikasle ausartarentzat. Neska umezurtz baten etorrerak proban jarriko du haien elkartasun sena tentsio handiko giro sozial batean, eta egoera horrek agerian utziko ditu haien zaurgarritasuna eta indarra.

• Sucia (2025). Bàrbara Mestanza, Marc Pujolar. Espainia

Masaje batean sexu-eraso bat jasan ondoren, Bàrbara Mestanza aktoreak arte bihurtzen du trauma: antzezlan gordin eta kontzesiorik gabeko bat. “Zergatik ez zenuen ezer egin?” galderaren aurrean, bidaia bati ekiten dio bere erasotzailea aurkitzeko, maskulinotasun toxikoa kuestionatzeko eta bere ahotsaren bitartez justizia aldarrikatzeko.