"Itzulera" lanak irabazi du XXVI. Donostia Antzerki Saria

Epaimahaiaren iritziz, taldeak Mexikora egindako bidaia kontatzen digun lan irabazleak historia eszenan jartzeko elementu eta lengoaia desberdinak erabiltzen ditu emaitza biribila lortuz. Antzerkia eta zinema uztartzen dituen road movie honetan, objektu eta bideoen erabilera oso originala da. Era berean, abestiak eta musika ere oso landuak dira eta ekarpen handia egiten diote antzezlanari. Lan osoa da, erritmo bizikoa, denboran eta lekuetan atzera-aurrera arin egiten duena eta umorea tresna gisa bikain erabiltzen duena. Horren ondorioz, publikoarekin lortzen duen konexioa erabatekoa da.

Argumentuari dagokionez, umorearen eta erritmoaren eraginez arina dela eman dezakeen arren, gai sakonak ere azaleratzen eta nabarmentzen dira antzezlanean. Euskal sortzaileek bizi duten errealitatea islatzen dute: antzerki konpainia baten krisia, dirulaguntzen afera, aurrera egiteko zailtasunak, sormena eta abar.

Dejabu konpainia irabazleak 12.000 euro eta Nora Pilarte Galdona margolariaren lan bat jasoko ditu sari gisa. Saria emateko ekitaldia martxoaren 27an izango da, Antzerkiaren Nazioarteko Egunean, 19:30ean, Victoria Eugenia Antzokian. Saria eman ondoren, Itzulera antzezlan irabazlea eskainiko da.

Gonbidapenak martxoaren 25ean egongo dira eskuragarri Victoria Eugenia Antzokiko leihatilan, goizeko 11:30etik aurrera.